యువస్పందన

కొన్ని జీవాలంతే

కుక్కపిల్ల తన తోకను పట్టుకోవటానికి
తనచుట్టూ తానే తిరుగుతుంది
అదేదో ఆటనుకొని తనను తానే కొరుక్కొని
బాధతో విలవిలాడుతుంది

ఈ జీవి కూడా అంతే
సాధించైనా ఏదో సాధించేయ్యాలని
అయిన వారిని బాధిస్తుంది
గుండెకు గాయం చేస్తుంది
తాను బాధలు సృష్టించుకుంటుంది
జీవితం నాశనం చేసుకుంటుంది
కొన్నిసార్లు శరీరమే కాల్చుకుంటుంది

ఆ కుక్కపిల్లది అమాయకత్వం
ఈ జీవిది మూర్ఖత్వం, కొన్ని జీవాలింతే

తన రెక్కల వెలుతురో బ్రతుకు సాగించే
మిణుగురు పురుగును చూసైనా నేర్చుకోదు
దీపమున్నప్పుడే ఇల్లు చక్కదిద్దుకోవాలని
మసక వెలుతురులోనుంచి బ్రతుకును
వెలుగు రేఖలలోకి మళ్ళించుకోవాలని

ప్రక్కవాడి కొవ్వొత్తి వెలుతురు గుడ్డి దీపమని
ఎగతాళి చేసి మనసు గాయం చెయ్యటం తప్ప

కష్టపడి ఒకొక్క పుల్ల ఏరి మరీ
గూడు కట్టే పిట్టను చూసైనా నేర్చుకోదు
జీవితంలో ఒక్కో మెట్టూ ఎక్కి నిలబడాలని
తలమీద కెక్కి తొక్కి హింసించటం తప్ప

కొన్ని జీవాలింతే
ఆ బ్రతుకు అట్లా తెల్లార్సిందే ....

.... మోహనరాగం Krish Chintalapati