అందమైన కవిత్వం

అందమైన కవిత్వం -పద్మావతి రాంభక్త
..............................
రోజూ కాసిని అక్షరాల గింజలను
చల్లకపోతే రోజంతా రెక్కలల్లార్చి కష్టించే రెప్పల పావురాలు
సేదదీరవు
కొన్ని పదసుమాలను పోగేసి
మునివేళ్ళతో వీలయినపుల్లా
దండలల్లకపోతే రోజంతా
పనులతో తలమునకలయ్యే
చేతికొమ్మలకు అలసటతీరదు
కొన్ని పరిమళభరితవాక్యాలను అనుభవాలతో మేళవించి
ఒక చక్కని కవితకు
జన్మనివ్వకపోతే నిత్యం బ్రతుకుబరిలో పోరాడి
భారమైన మనసు తేలికపడదు
కనీసం అప్పుడప్పుడయినా
కొన్ని అద్భుతకలాల నుండి జాలువారిన
అందమైన కవిత్వాన్ని
చదువుతూ  మైమరిస్తేనే  గానీ
మలినమైన మాటల
బరువును మోసుకుంటూ
నత్తనడకలా సాగిన జీవితం రసాస్వాదనతో ప్రక్షాళనై
కొత్త రంగులద్దుకుని
నవ్యోత్సాహంతో పరుగులు తీయదు
......పద్మావతి రాంభక్త