యువస్పందన

                         కొన్ని జ్నాపకాలంతే
       
నిజం చెప్పొద్దూ!
కొన్ని జ్నాపకాలంతే!

వాటిని నెమరేసుకున్నపుడల్లా
అమ్మచేతి  కమ్మని కాఫీ నయిపోతాను
మామిడి  తోపుల్లో తిరుగాడే
బాల్యాన్నయిపోతాను

కాసేపు -
ఆ జ్నాపకాల జడివానలో
తడిసా. ..........క

పొరలు పొరలుగా విచ్చుకున్న
మట్టి పెళ్ళనై  పులకించిపోతుంటాను
చెలమనీటి ఊటనై ఊరుతుంటాను

స్మృతులన్నీ మననం చేసుకున్నాక
గుమ్మాన వేళ్ళాడే  మామిడి తోరణమై
మురిసిపోతుంటాను
కోయిలపాటల కమ్మదనమై
పరవశించిపోతుంటాను

కొత్త  చిగురులతో
కొమ్మకొమ్మనీ పలుకరించే
వసంతమై
ఏకంగా    పచ్చదనం పూసుకుంటాను
అమ్మమ్మ ఊరునై
మళ్ళీ..........మళ్ళీ. ......
ఊసుల్ని తడుముకుంటాను

                          చెళ్ళపిళ్ళ శ్యామల